پاکستانی ٹیم ایشین بیچ ہینڈبال چیمپئن شپ میں شرکت کیلئے 12 جون کو چین جائے گی

کراچی: پاکستان کی 12 رکنی قومی ہینڈ بال ٹیم چھٹی ایشین بیچ ہینڈبال چیمپئن شپ میں شرکت کے لیے 12 جون کو روانہ ہوگی، چیمپئن شپ 15 سے 22 جون تک چین کے شہر وی ای آئی میں شیڈول ہے۔

پاکستان ہینڈبال فیڈریشن کے صدرمحمد شفیق کے مطابق چیمپئن شپ میں پاکستان کے وکٹری اسٹینڈ تک رسائی پانے کا قوی امکان ہے، چیمپئن شپ کی تفصیلات بتاتے ہوئے انہوں نے کہا کہ  12 ممالک کے درمیان کھیلے جانے ان مقابلوں میں قطر اپنے اعزاز کا دفاع کرے گا جبکہ دیگر ممالک میں جاپان، فلپائن، تھائی لینڈ، ویت نام، چائنیز تائپے، ایران، اومان، سعودی عرب، انڈونیشیا، پاکستان اور افغانستان شامل ہیں۔

میزبان ہونے کے باوجود چین چیمپئن شپ میں شریک نہیں ہورہا، ایونٹ میں شرکت کے لیے 12 رکنی قومی ٹیم میں 10 کھلاڑیوں کے ساتھ 2 آفیشلز بھی چین جائیں گے۔

ایشیا ہینڈ بال فیڈریشن میں سیکریٹری جنرل کے عہدے پر فائزمحمد شفیق نے کہا کہ ایشین بیچ ہینڈ بال ایونٹ میں دلچسپ لیکن سخت مقابلے متوقع ہیں، تاہم سابقہ کارکردگی کو مدنظر رکھتے ہوئے کہا جاسکتا ہے کہ پاکستان وکٹری اسٹینڈ تک پہنچنے میں ضرور کامیاب رہے گا، گزشتہ چیمپئن شپ میں پاکستان نے سلور میڈل اپنے نام کیا تھا۔

Comments are closed.